استغاثت سيدة تدعى إنجي فايز، البالغة من العمر 32 عامًا، مقيمة في منطقة دوران شبرا بالقاهرة، من زوجها بسبب منعها من تمكين الشقة وتعديه عليها.
سيدة تستغيث من زوجها
وقالت السيدة إنجي إنها تزوجت في عام 2019 ولكن بعد مرور شهرين من الزواج اكتشفت أن زوجها يتعاطى المواد المخدرة، زاعمة: زوجي كان بيطلع صحابه يشربوا في الشقة، وللأسف أنا حملت في أول الزواج وكان لازم أكمل عشان بيتي والطفل اللي جاي.
وأضافت أنها أعربت لزوجها عن رفضها تعاطيه المخدرات وأصدقائه في الشقة، إلا أنه لم يستجيب لها نهائيًا، رغم شكواها لأسرته ولكن كان الأمر دون جدوى.
وادعت: كنت دايمًا بتكلم مع زوجي وبقوله مينفعش اللي بتعمله، وأنا واحدة ست إزاي تجيب صحابك يشربوا مخدرات في البيت، اللي بيشرب مش بيبقى في وعيه، ولكن مكنش فيه فايدة وتعبت من كتر الكلام معاه، وعلى طول كنت بغضب وأسيب الشقة ويرجع ياخدني من أهلي ويوعدني يبطل مخدرات ولكن ده محصلش.
وأوضحت السيدة إنجي أنها مرت بالعديد من المواقف الصعبة خلال فترة زواجها، زاعمة: حملت تاني بعد 5 شهور من ولادتي ابني الأول، ولما جوزي عرف هو وأهله كانوا عاوزين يسقطوني، وبالفعل سقطوني وضحكوا عليا لما كنت تعبانة وعندي برد وادوني حقنة للإجهاض على إنها علاج للبرد.
وادعت إلى أن حماتها طلبت منها أن تعطيها مصوغاتها الذهبية الخاصة بها، ولكنها رفضت ذلك فتعدت عليها بالضرب وزوجها، مضيفة: حماتي طلبت مني الدهب بتاعي ولما رفضت ضربتني هي وجوزي وكتفوني وخدوا مني الدهب.
واستكملت السيدة إنجي أنها حررت محضر بالواقعة وتوجهت لأحد المحامين لرفع دعوى تمكين من مسكن الزوجية، قائلة: لما زوجي وحماتي ضربوني كنت حامل للمرة التانية بعد ما سقطوني، وزوجي مرضاش يمكني من الشقة غير بعد ما ولدت، ولما روحت الشقة لقيتها فاضية تمامًا وحاجتي كلها مش موجودة، وبعدها مسكني وضربني وبهدلني ومشيت من البيت
